Guverineri Gasana yijeje ubuvugizi Ibitaro bya Kibungo ngo birusheho kunoza serivise

Kuri uyu wa gatatu tariki 10 Gicurasi 2023 Guverineri w’Intara y’iburasirazuba CG Emmanuel K. Gasana ari kumwe n'abandi bayobozi mu nzego zitandukanye yagiriye uruzinduko rw'akazi mu bitaro bikuru bya Kibungo, asura ahavurirwa indwara zinyuranye, anaganira n'abakozi b'Ibitaro ku buryo imikorere ihagaze ndetse n'uburyo serivise yarushaho kunozwa.

Umuyobozi mukuru w'Ibitaro Dr. Gahima John yagaragarije Guverineri uko ibitaro bihagaze mu mitangire ya serivise zihabwa abaje kwivuza, agaragaza ibyo kwishimira, anaboneraho kugaragaza imbogamizi zigihari zikeneye gushakirwa ibisubizo birimo umubare w’abakozi udahagije hagendewe ku mubare w’abagana ibitaro, ndetse n’ibirebana n’ibikorwaremezo birimo kuvugurura inyubako zangiritse ibisenge.

Guverineri Gasana yashimiye abakozi ku musanzu wabo mu guteza imbere imibereho myiza y'abaturage, yizeza ubuyobozi bw'ibitaro ko ibibazo bigihari birenze ubushobozi bw'ibitaro bizakorerwa ubuvugizi mu nzego bireba.