Kuri uyu wa 12 Gashyantare 2026, ku Bitaro Bikuru bya Kibungo habereye igikorwa cyo kwizihiza umunsi mukuru w’abarwayi ku nsanganyamatsiko «Impuhwe z’umunyasamariya: Gukunda wakira ububabare bw’undi».

Ni igikorwa kitabiriwe n’Umuyobozi w’Akarere ka Ngoma Niyonagira Nathalie,Umuyobozi w’Ibitaro Dr. Munyemana Jean Claude, abayobozi mu nzego zitandukanye, abahagarariye amadini n’amatorero n’imiryango iyashamikiyeho, abo mu nzego z’abikorera, abakozi b’Ibitaro, abarwayi n’abarwaza

Dr. Munyemana yifurije umunsi mwiza abarwayi abizeza gukomeza kubona serivisi nziza, ati "Icyo duhora duharanira ni ugukora igishoboka cyose ngo tubiteho uko bikwiye, tubahe serivisi nziza, mukire vuba, musubire mu mirimo yanyu yo kwiteza imbere".

Umuyobozi w'Akarere ka Ngoma Niyonagira Nathalie yihanganishije abarwayi abifuriza gukira vuba, abizeza ko Akarere kazakomeza kubaba hafi ati "Uyu ni umwanya mwiza wo kubereka ko tubari hafi. Turabizeza ko dukomeje guteza imbere serivise z'ubuzima dufatanije na Minisiteri y'Ubuzima"

Muri iki gikorwa buri murwayi yahawe impano igizwe n’ibyo kurya n’ibikoresho by’ibanze nkenerwa by’isuku.