Itsinda ryasuzumaga iyubahirizwa ry’ibipimo by’ireme ry’ubuvuzi - riturutse muri Rwanda Agency for Accreditation and Quality Healthcare (RAAQH) binyuze mu bufatanye na Minisiteri y’Ubuzima mu Rwanda - ryasoje uruzinduko rw’iminsi ine mu bitaro Bikuru bya Kibungo.

Mu gusoza imirimo yaryo, abarigize bagaragarije ibyavuye mu isuzuma abakozi b’Ibitaro bari barangajwe imbere n’Umuyobozi mukuru Dr. Gahima John kumwe n’Umuyobozi w’Akarere ka Ngoma wungirije ushinzwe imibereho myiza y’abaturage Mukayiranga Marie Gloriose wari umushyitsi mukuru.

Dr. Gahima John yashimangiye akamaro k’iri suzuma ku bitaro no ku babigana, avuga ko ahatunzwe agatoki ko hakeneye kongerwa imbaraga bizakorwa mu nyungu zo kuzamura imibereho myiza y’abaturage nk’uko biri mu ntego z’Ibitaro. Yanasabye abakozi guhora bahanze amaso kuzamura ireme rya serivise bidasabye kugenzurwa.

Mukayiranga Marie Gloriose yashimiye abaje gukora iri suzuma, anashimira minisiteri y’Ubuzima ihora ikora ibishoboka byose ngo izamure ireme rya serivise z’ubuvuzi mu mavuriro, anasaba ubuyobozi n’abakozi b’Ibitaro bikuru bya Kibungo gukomera ku ntego yo kunoza imitangire ya serivise.